නවසීලන්ත සංචාරයට යන ශ්‍රී ලංකා ක්‍රිකට් පිල නම් කෙරේ

මේ වන විට නවසීලන්තය සමග පැවැත්වෙන තරග තුනකින් සමන්විත එක්දින සහ පන්දුවාර 20 - 20  ක්‍රිකට් තරගාවලියට සහභාගි වන ශ්‍රී ලංකා එක්දින සහ පන්දුවාර 20 - 20  සංචිතයන් නම් කර තිබේ.

 

21 දෙනෙකුගෙන් සමන්විත මෙම සංචිතය සඳහා ආබාධයන්ට ගොදුරු ව ක්‍රිකට් පිටියෙන් ඉවත්ව මේ වන විට පූර්ණ සුවය ලබා සිටින දුෂ්මන්ත චමීර එක්දින සහ පන්දුවාර විස්ස සංචිතයටත්, කුසල් ජනිත් පෙරේරා පන්දුවාර 20 - 20 සංචිතයටත් ඇතුළත් කර ඇති බවට ක්‍රිකට් අභ්‍යන්තර ආරංචිමාර්ග මගින් වාර්තා වේ. මීට අමතරව ශ්‍රී ලංකා එක්දින සංචිතයට ඇන්ජලෝ මැතිව්ස් ද යළි කැඳවා තිබීම කැපී පෙනේ.

 

නවසීලන්ත එක්දින සහ පන්දුවාර 20 - 20 තරගාවලියට එක් වන ශ්‍රී ලංකා සංචිතය වන්නේ පැතුම් නිශ්ශංක, කුසල් මෙන්ඩිස්, ධනංජය ද සිල්වා, චරිත් අසලංක, දසුන් ශානක, නුවනිදු ප්‍රනාන්දු, සධීර සමරවික්‍රම, වනිදු හසරංග, දුනිත් වෙල්ලාලගේ , මහීෂ් තීක්ෂණ, කසුන් රාජිත, ලහිරු කුමාර, ඩිල්ෂාන් මදුශංඛ,චාමික කරුණාරත්න සහ දුෂ්මන්ත චමීර යන ක්‍රීඩකයන්ය.

 

ශ්‍රී ලංකා ක්‍රිකට් ආයතනය විසින් මෙතෙක් ශ්‍රී ලංකා එක්දින සහ පන්දුවාර 20 - 20 සංචිතයත් නිල වශයෙන් ප්‍රකාශ කර නොමැති අතර තරග දෙකකින් සමන්විත ටෙස්ට් ක්‍රිකට් තරගාවලිය සඳහා සහභාගි වන ශ්‍රී ලංකා ටෙස්ට් කණ්ඩායම අද රාත්‍රියේ නවසීලන්තය බලා පිටත් වීමට සැලසුම් කර ඇත.