නෙළුම් කුලුනේ බිත්ති කුරුටු ගෑ යුවළක් අත්අඩංගුවට

කොළඹ නෙළුම් කුලුන නැරඹීමට පැමිණි තරුණ යුවළක් කුලුන මත ඇති බිත්තියක කුරුටුගාමින් සිටිය දී අත්අඩංගුවට ගෙන තිබේ.

 

කුලුනේ යොදවා සිටින ආරක්ෂක අංශ විසින් ඊයේ (30) සවස ඔවුන් දෙදෙනා අත්අඩංගුවට ගෙන ඇති අතර පසුව පොලීසියට භාරදීමට කටයුතු කර ඇත.

 

නෙළුම් කුලුනේ නඩත්තු කටයුතුවලට විශාල වියදම් දැරීමට සිදුවන බවත් ජනතා මුදලින් ඉදිකර ඇති මෙම දේපළ ආරක්ෂා කරගැනීම ජනතාවගේ වගකීමක් බවද නෙළුම් කුලුන පෞද්ගලික ආයතනයේ වෙළෙඳ විධායක නිලධාරී බිම්සර රොසයිරෝ මහතා මීට පෙර සඳහන් කර තිබුණි.

 

මහජනතාව වෙත නෙළුම් කුලුන විවෘත කරන අවස්ථවේ නිවේදනයක් නිකුත් කරමින් නෙළුම් කුලුන පෞද්ගලික ආයතන පවසා සිටියේ කුලුන නැරඹීමට පැමිණෙන ජනතාව එහි දේපළවලට හානි සිදුකළහොත් ඔවුන්ට දැඩි දඬුවම් ලබාදෙන බවය.