උපාධිධාරීන් හයදහසක් ගුරු වෘත්තියට

උසස් පෙළ ගුරු හිඟයට පිළියම් යෙදීම සඳහා ශ්‍රී ලංකාවේ අධ්‍යාපන අමාත්‍යාංශය උපාධිධාරීන් 6000ක් බඳවා ගැනීමට සැලසුම් කර ඇත. 

 

 

අධ්‍යාපන ඇමැති ආචාර්ය සුසිල් ප්‍රේමජයන්ත මහතා ඊයේ (04)මෙම තීරණය තහවුරු කළේය. බඳවා ගැනීම් මූලික වශයෙන් විද්‍යාව, ගණිතය, වාණිජ්‍යය සහ තාක්ෂණය යන විෂය ධාරාවන් කෙරෙහි අවධානය යොමු කරනු ඇත.

 

 

බඳවා ගන්නා මුළු සංඛ්‍යාවෙන් ගුරුවරුන් 1000ක් පමණ ජාතික පාසල් සඳහා වෙන් කෙරෙන අතර සෙසු පිරිස පළාත් සභා යටතේ ඇති පාසල් සඳහා ද බඳවා ගැනේ. එක් එක් පළාත සඳහා වෙන වෙනම බඳවාගැනීම් පැවැත්විය හැකි බවත්, පවතින පුරප්පාඩුවලට වඩා අයදුම්කරුවන් සංඛ්‍යාව වැඩි වුවහොත් තරඟ විභාගයක් පවත්වන බවත් අමාත්‍යවරයා සඳහන් කළේය.

 

 

බඳවා ගැනීමේ ක්‍රියාවලිය අධීක්ෂණය කිරීම සඳහා අමාත්‍යාංශය විසින් අග්‍රාමාත්‍ය ලේකම් අනුර දිසානායක මහතාගේ ප්‍රධානත්වයෙන් කමිටුවක් පිහිටුවා ඇත. 

 

 

පාසල්වල ගුරුවරුන් 30,000ක පමණ හිඟය පියවීම සඳහා උපාධිධාරීන් සංවර්ධන සහකාරවරුන් ලෙස බඳවා ගැනීමට මීට පෙර අමාත්‍යාංශය අදහස් කර තිබුණි. කෙසේ වෙතත්, ශ්‍රේෂ්ඨාධිකරණ නියෝගයක් හේතුවෙන් මේ සම්බන්ධයෙන් අවසන් තීරණයක් ගැනීමට අමාත්‍යාංශයට නොහැකි වී තිබේ.