වර්ජන පැවතියත් අද දුම්රිය ගමනේ

වෘත්තීය සමිති ක්‍රියාමාර්ග නොතකා මගීන්ගේ පහසුව වෙනුවෙන් අද උදෑසන 8 සිට දුම්රිය සේවා 21 ක් ක්‍රියාත්මක වූ බව දුම්රිය දෙපාර්තමේන්තුවේ සාමාන්‍යාධිකාරී (GMR) W. A. D. S. ගුණසිංහ මහතා ප්‍රකාශ කර ඇත. දුම්රිය සේවකයන් කැපවීමෙන් කළ සේවයේ ප්‍රතිඵලයක් ලෙස ප්‍රධාන මාර්ගයේ, මුහුදුබඩ මාර්ගයේ, කැලණිවැලි මාර්ගයේ සහ පුත්තලම මාර්ගයේ දුම්රිය කිහිපයක් අද උදෑසන ධාවනය වූ බව ඔහු වැඩිදුරටත් සඳහන් කර තිබේ. 

 

 

එක් දුම්රියක් බෙලිඅත්ත, ගාල්ල සහ අලුත්ගම සිට ආරම්භ වී ඇති අතර  හලාවත සිට දුම්රිය දෙකක්, මහව සිට එක් දුම්රියක්, මහනුවර සිට එක් දුම්රියක්, රඹුක්කන සිට එක් දුම්රියක් සහ අවිස්සාවේල්ලෙන් එක් දුම්රියක්ද වශයෙන් අද උදෑසන දුම්රිය ගමන් ආරම්භ වී ඇත. මේ අතර පානදුර සහ ගම්පහ අතර දුම්රිය කිහිපයක්ද ක්‍රියාත්මක වූ බව සාමාන්‍යාධිකාරීවරයා පවසා තිබේ. දුම්රිය එන්ජින් ක්‍රියාකරුවන්ගේ සංගමයේ සාමාජිකයින් සේවයට වාර්තා නොකිරීම හේතුවෙන් අද උදෑසන සාමාන්‍ය පරිදි දුම්රිය ධාවනය කිරීමට අපහසුතා ඇති වූ නමුත් ජ්‍යෙෂ්ඨ රියදුරන්ගේ සහායෙන් දුම්රිය කිහිපයක සේවය ලබාදීමට හැකි වී ඇත.

 

 

දුම්රිය එන්ජින් ක්‍රියාකරුවන්ගේ හිඟය හේතුවෙන් දිවා කාලයේ දුම්රිය කිහිපයක් අවලංගු වීමට ඉඩ ඇති බවත් සවස් කාලයේ ධාවනය කිරීමට නියමිත දුම්රියන් ප්‍රකාශයට පත් කරන බවත් සාමාන්‍යාධිකාරී ගුණසිංහ මහතා තවදුරටත් සඳහන් කර තිබේ.