මෙවර රාජ්‍ය වෙසක් උත්සවය යාපනයෙදී

මෙවර රාජ්‍ය වෙසක් උත්සවය උතුරු හා නැගෙනහිර පළාත් මුල්කර ගනිමින් නාගදීප රජ මහා විහාරය කේන්ද්‍ර කොට ගෙන පැවැත්වීමට අග්‍රාමාත්‍ය මහින්ද රාජපක්ෂ මහතා ඊයේ (25) පස්වරුවේ අරලියගහ මන්දිරයේ දී උපදෙස් දී තිබෙනවා

 

ඒ අනුව උතුරු හා නැගෙනහිර පළාත්වල විහාරස්ථාන 65ක් හා දහම් පාසල් 35ක් සම්බන්ධ කරගනිමින් මෙවර රාජ්‍ය වෙසක් උත්සවය පැවැත්වීමට නියමිතයි

 

මෙවර රාජ්‍ය වෙසක් උත්සවයේ විශේෂත්වය වන්නේ අනෙකුත් ආගම් සමඟ එක්ව වෙසක් උත්සවය සැමරීමට කටයුතු සැලසුම් කර තිබීම ය.

 

ඒ සඳහා බුද්ධශාසන, ආගමික හා සංස්කෘතික කටයුතු අමාත්‍යංශය යටතේ ඇති හින්දු, ක්‍රිස්ත්‍රියානි හා මුස්ලිම් කටයුතු දෙපාර්තමේන්තු ද එක් වේ.

 

උතුරු පළාතේ ප්‍රධාන අධිකරණ සංඝනායක, නාගදීප විහාරාධිපති ආචාර්ය ධර්මකීර්ති ශ්‍රී නවදගල පදුමකිත්ති නාහිමි, නැගෙනහිර තමන්කඩුව දෙපළාතේ ප්‍රධාන සංඝනායක මුංහේනේ මෙත්තාරාම නාහිමි, සමස්ත ලංකා ශාසනාරක්ෂක බලමණ්ඩලයේ ප්‍රධාන ලේඛකාධිකාරී ගෝනදූවේ ගුණානන්ද නාහිමි, මල්වතු පාර්ශ්වයේ මාතර හම්බන්තොට දෙදිසාවේ ප්‍රධාන සංඝනායක අග්‍රහැරේ කස්සප නාහිමි ඇතුළු මහා සංඝරත්නය මෙම අවස්ථාවට වැඩම කළහ.

 

රාජ්‍ය අමාත්‍ය විදුර වික්‍රමනායක, පාර්ලිමේන්තු මන්ත්‍රි සුරේන් රාඝවන්, බුද්ධශාසන, ආගමික හා සංස්කෘතික කටයුතු අමාත්‍යංශයේ ලේකම් මහාචාර්ය කපිල ගුණවර්ධන, ආරක්ෂක අමාත්‍යංශයේ ලේකම් ජනරාල් (විශ්‍රාමික) කමල් ගුණරත්න මහත්වරු ඇතුළු පිරිසක් ඊට එක්ව සිටියහ.