ඩයනාගේ පාර්ලිමේන්තු මන්ත්‍රීධුරය ගැන පෙත්සම විභාගයට දින නියම වේ

රාජ්‍ය ඇමතිනි ඩයනා ගමගේ මහත්මියගේ පාර්ලිමේන්තු මන්ත්‍රී ධුරය බල රහිත කිරීමේ රිට් ආඥාවක් නිකුත් කරන ලෙස ඉල්ලා ගොනු කර ඇති පෙත්සම ලබන මස 3 සහ 4 යන දිනවල විභාගයට ගැනීමට අභියාචනාධිකරණය අද (09) නියෝග කළේය.

 

සභාපති විනිසුරු නිශ්ශංක බන්දුල කරුණාරත්න සහ ඒ. මරික්කාර් යන විනිසුරු මඩුල්ල හමුවේ මෙම පෙත්සම අභියාචනාධිකරණයට කැඳ වූ අවස්ථාවේදී නියෝග කළේය.

 

සමාජ ක්‍රියාකාරිකයෙකු වන ඔෂල හේරත් ගොනුකර ඇති මෙම පෙත්සම පවත්වාගෙන යා නොහැකි බැවින් එය විභාගයට නොගෙන නිෂ්ප්‍රභ කරන ලෙස රාජ්‍ය ඇමතිනි ඩයනා ගමගේ වෙනුවෙන් පෙනී සිටි ජනාධිපති නීතිඥ ශවීන්ද්‍ර ප්‍රනාන්දු පසුගිය නඩු දිනයේ දී විරෝධතා මතු කළේය.

 

අභියාචනාධිකරණය පාර්ශවකරුවන්ට අද (09) නියෝග කළේ, මීට අදාළ ලිඛිත ලිපි ලේඛන මේ මස 27 වැනිදාට පෙර ගොනු කරන ලෙසයි.