නව පුනර්ජනනීය ව්‍යපෘති 330 ක් කඩිනම් කෙරේ
මෙම වසරේ (2023) සිට (2026) වසර දක්වා වසර හතර තුළ විදුලිබල මණ්ඩලය සහ සුනිත්‍ය බලශක්ති අධිකාරිය පුනර්ජනනීය බලශක්ති ව්‍යපෘති 330ක් ක්‍රියාත්මක කිරීමට කටයුතු යොදා ඇති බව විදුලිබල හා බලශක්ති අමාත්‍ය කංචන විජේසේකර මහතා සඳහන් කරයි.
එහිදී රාජ්‍ය ආයතනවලින් අනුමැතිය දියහැකි ව්‍යාපෘති කඩිනම් කිරීමට සහ අනුමැතියන් දිය නොහැකි ව්‍යාපෘති වෙනුවෙන් දැනට දී ඇති තාවකාලික බලපත්‍ර අහෝසි කිරීමටත් තීරණය කළ බව ඔහු කියා සිටී.
එමෙන්ම පුනර්ජනනීය බලශක්ති ව්‍යාපෘති ක්‍රියාත්මක කිරීමට අනෙකුත් රාජ්‍ය ආයතනවලින් අවශ්‍ය බලපත් සහ අනුමැතියන් ලබා ගැනීමේ සහ එම ලබා ගෙන ඇති බලපත්‍ර දීර්ඝ කරගැනීමේ ක්‍රියාවලිය කඩිනම් කිරීමට ද ඔහු උපදෙස් ලබා දී තිබේ.
අමාත්‍යවරයා සහ රාජ්‍ය ආයතනවල ප්‍රධානීන් සහ නියෝජිතයන් සමග පැවැති සාකච්චාවකදී අමාත්‍යවරයා එසේ පවසා තිබේ.
එම අවස්ථාව සඳහා විදුලිබල අමාත්‍යංශය, විදුලිබල මණ්ඩලය, සුනිත්‍ය බලශක්ති අධිකාරිය, පරිසර අධිකාරිය, වනසංරක්ෂණ දෙපාර්තමේන්තුව, වනජීවී දෙපාර්තමේන්තුව, මහවැලි අධිකාරිය, ගොවිජන සේවා දෙපාර්තමේන්තුව, ඉඩම් අමාත්‍යංශය, වැවිලි කර්මාන්ත අමාත්‍යංශය, වාරිමාර්ග අමාත්‍යංශය, ප්‍රාදේශීය ලේකම් කාර්යාල, ධීවර අමාත්‍යංශය, මාර්ග සංවර්ධන අධිකාරිය, ජල සම්පාදන මණ්ඩලය, පළාත් පාලන ආයතනවල ඇතුළු වතු සමාගම් නියෝජනය කරන නිලධාරීන් මාර්ගගත ක්‍රමයෙන් සම්බන්ධ විය.
225 Views
Comments