පොලොන්නරුවේ ගොවීන්ගේ වී මිලදී ගැනීම අරඹයි

රජයේ වී මිලදී ගැනීමේ වැඩපිළිවල යටතේ එක් ගොවියෙකුට සීමාවකින් තොරව වී අලෙවි මණ්ඩලයට වී අලෙවි කිරීමේ හැකියාව පවතින බව එහි උප සභාපති දුමින්ද ප්‍රියදර්ශන මහතා පවසයි.

 

 නියමිත ප්‍රමිතියෙන් යුත් කීරි සම්බා වී කිලොවක් සඳහා රුපියල් 55 ක්ද සම්බා වී කිලෝවක් සඳහා රුපියල් රුපියල් 50ක් සහ නාඩු වී කිලෝවක් සඳහා රුපියල් 50ක් වශයෙන් රජයේ සහතික මිලක් ගොවීන් වෙත ගෙවනු ලබන බවද ඒ මහතා සඳහන් කළේය.

 

එමෙන්ම මණ්ඩලයට අලෙවි කරනු ලබන සෑම වී කිලෝවක් සඳහාම වී අලෙවි මණ්ඩලය රු.1.50ක මුදලක් ප්‍රවාහන වියදම් වශයෙන් ගොවියාට ලබාදෙන බවද පැවසුවේය.

 

පොලොන්නරුවේ රජයේ වී මිලදී ගැනීමේ වැඩපිළිවෙල සොයා බැලීම සඳහා නිරීක්‍ෂණ චාරිකාවක නිරතවෙමින් උප සභාපතිවරයා මේ අදහස් පලකලේය.

 

පෞද්ගලික සහල් මෝල් හිමියන් විසින් තෙතමනය සහිත වී මිළදී ගැනීමේ වැඩපිළිවෙල මෙවරද ක්‍රියාත්මකවන බවද හෙතෙම සඳහන් කලේය.

 

මේ වනවිට පොලොන්නරුව දිස්ත්‍රික්කයේ ගොවීන්ගේ වී මිලට ගැනීම ආරම්භකර ඇතිබව වී අලෙවි මණ්ඩලයේ පොලොන්නරුව ප්‍රාදේශීය කළමනාකරු නිමල් ඒකනායක මහතා කීය.