රුවන්වැලි සෑයේ චූඩාමාණික්‍යයත් උස්සලා? - සීඅයිඩී පරීක්ෂණ ඇරඹෙයි
රුවන්වැලි මහා සෑයේ පැරණි කොතේ පලඳා ඇති මැණික් ගල්(චූඩා මාණික්‍ය) ගලවා ඒ වෙනුවට වීදුරුගල් අල්ලා ඇතැයි එල්ලවන චෝදනා කෙරෙහි විශේෂ අවධානයක් යොමු කරමින් විමර්ශනයක් පවත්වන ලෙස පොලිස්පති සී.ඩී. වික්‍රමරත්න විසින් අපරාධ පරීක්ෂණ දෙපාර්තමේන්තුවේ නියෝජ්‍ය පොලිස්පතිවරයාට නියෝග කර තිබේ.
නුවර කලාවියේ ප්‍රධාන සංඝනායක ස්වර්ණමාලී චෛත්‍යරාමාධිකාරී පල්ලේගම හේමරතන හිමියන් සහ දායක සභාව විසින් පොලිස්පතිවරයාගෙන් ඒ සම්බන්ධයෙන් කර තිබුණු ඉල්ලීම් කිහිපයක් මුල් කරගෙන එම නියෝගය කර ඇත.
දායක සභාව පොලිස්පතිවරයාගෙන් ඉල්ලා තිබෙන්නේ සමාජ මාධ්‍ය තුළ මේ සම්බන්ධයෙන් හුවමාරු වන තොරතුරු අසා තමන් විමතියට පත්ව ඇති බැවින් ඒ සම්බන්ධයෙන් විමර්ශනයක් පවත්වන ලෙසටයි.
එම විමර්ශනය අවසානයේදී මහජනතාවට ඒ සම්බන්ධයෙන් නිවැරැදි තත්ත්වය පැහැදිලි කර දීමට කටයුතු කරන ලෙසටත් දායක සභාව ඉල්ලා ඇත.
දායක සභාවේ මේ ඉල්ලීමට මුල්වී තිබෙන්නේ අන්තර්ජාල නාලිකාවක පැවති සංවාදයකදී අයෙක් විසින් කොත්වහන්සේ සම්බන්ධයෙන් කළ ප්‍රකාශයකි.
පල්ලේගම හේමරතන හිමියන් විසින් පොලිස්පතිවරයාට මේ සම්බන්ධයෙන් විමර්ශනයක් පවත්වන ලෙස ඉල්ලීම කර ඇත්තේ දායක සභාවේ ඉල්ලීමට පෙර බවද මේ අතර මාධ්‍ය වාර්තා කර තිබේ.
329 Views
Comments